Ande Palata Srbija sikadine si e rezultaturja save si phangle palo nakhadipe Akcione planosko palo čačaripe orturjengo nacionalne minoriteturjengo, savo inćarel vi e vaćardimata pala avutnimaske lačhardimata ando mištardipe e standardurjenca Evropaće Konsilestar thaj Evropaće unijava.

Ando alav Nacionalne konsilestar rromane nacionalne minoritetostar, po sikadipe sas e šerutni Gatisarimašće odborestar Pava Čabrilovski, membro Gatisarimašće odborestar Živana Živanović thaj šerutni Odborestar palo informišipe, Željana Nikolić.

Von inkaldine kaj si o Nacionalno konsilo e Rromengo but kamlo ando dićhipe Akcione planosko thaj kaj vi pala avutnimasko dešujekto raporto dela komentarja save inćarena palo kamipe čačaripe AP ando pherdo nakhadipe. E mere save si udžilipe Nacionalne konsilestar e Rromendar nakhavenpes talo plano thaj programo, pala soste o Konsilo bičhalela raporto pala anglune t čhona, akanutne 2019. brš.
Ando alav Kancelarijako pale manušikane thaj minoritane orturja, savi vi sas ćerdimatari thaj mothodimatar, vaćarda vu e direktori kancelarijaći, Dr Suzana Paunović savi inkalda kaj si baro đindo kolengo save inđaren e mere lino kotor ando proceso mothodimasko thaj godoleja sikavel lundžardo gatisaripe te majbuhljarelpes o than membrurjengo nacionalne minoritetonengo. Paunović sikada kaj kava proceso trubull majdur te buhljarelpes thaj kaj si godova jekh katar rezonurja sostar si vi ćerdini analiza raportsoki.

Po mothodipe sas vi o šerutno misijako Evropaće Konsilestar ando Beogrado Tobias Flesenkemper savo sikada piro bahatlipe khetanimaske nakhadimasa bute bućarimatengo palo zurjavipe institucionalne thaj dinemothodimaske fundostar Republikatar Srbijatar. Evropako Konsilo lundže brša del zurjavipe raštraće ando kamipe nakhadimasko e merengo save therena majvučo nivelo pherdimasko maškarthemutne standardurjengo palo lesamalipe manušikane thaj minoritane orturjengo.