MAŠKARTHEMUTNO ĐES DINIMASKE GOĐAKO PE VIKTIMURJA HOLOKAUSTOSTAR ANDO DUJTO THEMESKO MARIPE
Maškarthemutno đes dinimaske gođako pe viktimurja Holokaustostar lošanisardo si ađes raštraće ceremonijava čhutimasa e kujbujendar luluđendar thaj dinipe paćivalimastar, ko liparimasko bar viktimonenđe genocideostar ando Dujto themesko maripe savo si ando kotor kompleksosko kaj sas kolevrjamako koncentraciono logori ando Staro Sajmište.
Bičhaldo prezidenostar Republikatar Srbijatar, ando kava brš sas o Nikola Selaković, ministro palo bućaripe, therdipe bućarimasko, marimašće thaj socijalne pučhimata. E kujburja luluđendar po Liparimasko bar viktimonenđe genocidostar čhutine vi o ministro pale avrjalune bućarimata Ivica Dačić, prezidento Parlamentosko Srbijako Vladimir Orlić, a sas vi e manuša andar Foro Beogrado, jevrejsko thaj rromano amalipe ande Srbija, e ambasadorja thaj katanijaće bičhaldimatarja, e manuša andar Židimata palo lesamalipe tradicjako tromalimašće marimatendar Srbijatar, thaj lenđe palutnimatarja.
Ando alav katar Nacionalno konsilo rromane nacionalne minoriteritorestar, o kujbo luluđendar čhutine arlisarimatari prezidentostar Alisa Šajn, prezidento Gatisarimašće odborestar Aleksandar Radulović, thaj prezidento Kulturaće maškarestar Pančevo thaj membro Konsilestar Stevan Jovanović. Pe ceremonija sas vi e membrurja Konsilestar, Zvonko Mitrović, Mile Ramić thaj Bajram Morina.
Maškarthekmutno đes dinimaske gođimasko pe viktimurja Holokaustostar fundosardapes po 01. novembro 2005. brš čhinadimava katar Generalno parlamento Jekhetane Nacijendar, a lošanisarelpe po sa jekh 27. januari sar liparipe po đes kana po agor Dujte themeske marimatar ando 1945. brš sovjetsko Loli armija tromalisarda Aušvic-Birkenau, maj bilačho thaj maj daravimasko logori mulimasko ande haradi Evropa.
Romski Jezik 
Српски језик