PARLAMENTO SRBIJAKO – PREZIDENTO NAKIĆ PO SIKADIPE KATAR NACIONALNA PLATFORMA PALA INTEGRACIJA E RROMENĐI ANDE SRBIJA
Prezidento Nacionalne konsilestar rromane nacionalne minoritetonendar, Dalibor Nakić sas ađes ando Parlamento Republikako Srbijako po sikadipe Nacionalne platformako pale integracija e Rromenđi ande Srbija. Pašo prezidento Nakić, ando alav katar Nacionalno konsilo, saas vi o prezidento Gatisarimašće odborestar, Pava Čabrilovski, pokrajinaći dikhljardi thaj membro Konsilesko, Jelena Jovanović, thaj guvernako membro ande Smederevska Palanka thaj membro Konsilesko, Zdravka Simić.
Andro andralunimasko kotor vaćardimasko dine svato o prezidento Parlamento, Ivica Dačić, ministro pale manušikane thaj minoritane orturja thaj amalimasko dijalogo, Gordana Čomić, thaj prezidento Nacionalne konsilesko rromane nacionalne minoritetonendar, Dalibor Nakić, a e Strategija palo socijalna inkluzija e Rromenđi thaj Rromnjenđi sikadine o raštrako sekretari Ninoslav Jovanović thaj džangllimasko kobućarno, Ivana Koprivica.
O prezidento Nakić ando piro mothodipe inkalda semnipe katar andini thaj revidirime Strategija thaj sikada paćape kaj vi o Akciono plano avela sigo ćerdino thaj andino čačardimava. ando majdurano kotor vaćardimasko, liparda o semnipe thaj naisaripe Thagarimašće Srbijaće thaj prezidentošće Thagarimašće palo baro bućaripe inkluzijaće e Rromendar, sar vi godolešće kaj o prezidento Brnabić si čikatuni Koordinacione kotorešće palo dićhipe nakhadimasko Strategijako.
Sar majbut rîspisardo nacionalno minoriteto ande Srbija, rromane populacijaće si but semno vi linipe kotoresko Lokalošće korkorroortuimatendar ando nakhadipe Strategijako, thaj o Nacionalno konsilo pe vrjama pindžarda godova fakto thaj sas ande vizite ande 85 forurja thaj guverne, majbut katar 250 rromane thana.
O Nakić akharda sa e raštraće thaj maškarthemutne institucije te hasnaren e potencijalurja rromane populacijatar sar barimasko manušikano thaj bućarimasko resurso, odolaći kaj sam majterni nacija ande Srbija phurimasa katar 28,3 brša.
Po agor inkalda „Amen sam gođarde pale godova kaj ekonomijava thaj politikane zurali Srbija šaj majbut te ćerel palo lesamalipe orturjengo thaj tromalipe sa laće forutnengo, sar vi amen e Rromen, thaj odolaći amen sajekh vrjama zumavasa te das amaro kotor palo lako zurjavipe thaj buhljaripe
kaj si godoja vi amari raštra, e raštra amare puranendar thaj amare čhavorrendar. Čačardo sem kaj avutnipe amare čhavorrendar ande amari šukar Srbija avela bahtali.“
Romski Jezik 
Српски језик