RAMOSARDAPES O MEMORANDUMO PALO KHETANIMASKO BUĆARIPE MAŠKAR “CARITAS NIŠ” THAJ “RROMANO KULTURAKO MAŠKAR NIŠ“

Ando rromano kulturakomaškar Niš, ramosardo si o Memorandumo palo khetanimasko bućaripe maškar Caritas Niš thaj Rromano kulturako maškar Niš, a sa sar agorisarenape planirime bućarimata palo nakhadipe projektosko “YOUR JOB” savo učharel finansijenca Austrijsko buhljarimašći agencija, Caritas Autrija thaj Caritas Francija.
“Plano sit e kava projekto lundžarelpes trin brša, thaj kamimašći kupa sikaven 1000 terne andar Srbija katar save si jekh opašin e manušnja. Kamipe projektosko si barjardipe thaj therdipe bućarimasko e ternengo, sar vi majbuhljaripe lenđe džanglimašće kapaciteturjengo save si trubusarde po tržište bućarimasko, a šerutne bućarimata si bipoćinde sikavimata pale averčhande bućarimata, sar vi akharipe pe konkursurja pale granturja palo teljaripe korkorrutne bućarimako. Kola save hasnarena o program avena majterne katar 30 trajimašće brša, sar vi kola save si lundževrjama bibućarne, sar vi majphare kategorije populacijatar save majphare theren bućaripe. Majdur, kamimašći kupa sikaven vi e kola save hasnaren socijalno ažutisaripe, e membrurja nacionalne minoritetonendar, persone save inćaren varesavo invaliditeto, bijandimatarja save korkorre vazden pire čhavorra, sar vi kola save haćardine thaj inćardine bilčahimasko zuralipe nakhavimasko ande familija”, mothoda o direktori Rromane kulturaće maškarestar, thaj membro odborestar pale kultura Nacionalne konsilestar e Rromendar, Svetislav Jovanović.
Po maladipe sas vi džipašerutno Gatisarimašće odborestar Nacionalne konsilestar e Rromendar, Igor Paunović.

RNS

See author's posts