RAMOSARDAPES O MIŠTARIMASKO LIL PALO KHETANIMASKO BUĆARIPE THAJ HAĆARIPE MAŠKAR NACIONALNO KONSILO THAJ ĆIDIPE OMBUDSMANONENGO SRBIJATAR

RAMOSARDAPES O MIŠTARIMASKO LIL PALO KHETANIMASKO BUĆARIPE THAJ HAĆARIPE MAŠKAR NACIONALNO KONSILO THAJ ĆIDIPE OMBUDSMANONENGO SRBIJATAR

Ađes ando foro Pančevo, ando bešimasko than Nacionalne konsilestar rromane nacionalne minoritetonendar, ramosardapes o Mištarimasko lil palo khetanimasko bućaripe thaj haćaripe maškar Ćidipe ombudsmanonendar thaj Nacionalno konsilo

Ando alav Konsilesko, o Mištarimasko lil ramosarda o prezidento Dalibor Nakić khetane e prezidentova Gatisarimašće odborestar Pavava Čabrilovski thaj prezidentostar Kulturaće maškarestar e Rromendar thaj membrostar Konsilestar, Stevanova Jovanović.

Ando alav Ćidimasko ombudsmanonengo Srbijatar, o Mištaripe ramosarda o prezidento Miladin Nešić khetanimasa e šerutnjava Ortuimašće odborestar, e rajava Jelenava Stojković Sokolović.

O prezidento Nakić inkalda kaj o khetanimasko bućaripe e institucijenca save bućaren palo lesamalipe manušikane thaj minoritane orturjengo inćarel baro semnipe palo Konsilo, thaj lundžarda: „Institucija ombudsmanošći si semno raštrako organo ando lesamalipe membrurjengo nacionalne minoritetonengo, sar vi aver forutnengo. Pe bibaht, e Rroma si jekh katar kategorija forutnendar opral save ćerelpes maj bari diskriminacija.

But čingarimašće lila save ombudsmanonenđe aresen phangle si palo biadekvatno, a butimasa vi diskriminacijako nakhavipe opral membrurja rromane nacionalne minoritetonendar. Andar godova rezono ramosaripe ađesutnimasko Mištarimaske lilestar si katar baro semnipe pala Nacionalno konsilo rromane nacionalne minoritetonendar. Ažućaras te sa kova so lipardape ande čingarimašće lila ande sa majharni vrjama dićhelpes, te ćerelpes kontrola, thaj te arakhladape te ćerdapes haradipe orturjendar thaj tromalimatar individualostar, jal džiko diskriminacijako nakhavipe, kola save si udžile trubun te inćaren trubulimasko došaldipe sar si vi čhutino ando Dino mothodipe palo ačhadipe diskriminacijako. Amaro kamipe naj te kola save ćeren diskriminacija došarenpes, amaro kamipe si te e diskriminacija sar negativno amalimasko ćerdipe haravas, ćićidas, jal te ciknjarasla po maj cikno nivelo savo šaj.

Kamas te khetanimaske bućarimava das amari zor palo vazdipe thaj ćerdipe demokratikane thaj multikulturalne amalimasko ande amari šukar raštra e Srbija“, mothoda o Nakić.

Ando piro mothodipe, o prezidento Gatisarimaske odborestar Pava Čabrilovski, liparda kaj ramosarimava kale Mištarimaske lilestar, o Konsilo sikada vučo nivelo udžilimasko pale forutne save dine paćivalipe thaj dine o mandato kale akharimašće thaj šerutnenđe te vaćaren len sar ande kotora pale kulturaći autonomija, gajda vi ande sa aver kotora save si semne pala rromani populacija, a uladimasa ando kotor lesamalimasko manušikane thaj minoritane orturjendar khetanimaske bućarimava e aver semne institucijenca.

Author: RNS

Leave a Reply

Your email address will not be published. Required fields are marked *