BUĆARIMASKO MALADIPE BEŠIMASKO E ANGLUNE FOROŠĆE MANUŠEJA ANDE SUBOTICA
Prezidento Nacionalne konsilestar rromane nacionalne minoritetonendar, Dalibor Nakić, inćarda bešimasko bućarimasko maladipe e anglune manušeja ande Subotica, Stevanova Bakić, po savo dikhlinepes e pučhimata pale inkluzija e Rromenđi ando kava foro, sar vi ašunimasko khetanimasko bućaripe maškar Foro thaj Nacionalno konsilo ande avutnimašći vrjama.
Ando alav katar Nacionalno konsilo, pašo prezidento Nakić, po maladipe sas vi o membro Nacionalne konsilestar thaj pokrajinaći dikhljardi, Jelena Jovanović.
E ćherutne, pašo forosko angluno Bakić, sas vi e koordinatorja pale inkluzija e Rromenđi ande Subotica, Stevan Nikolić thaj Klaudija Kurina, savi si vi membro Gatisarimasšće odboresko ando Nacionalno konsilo.
Ando piro mothodipe thaj mothodipe pale medije, o prezidetno Nakić mothoda – Kaj o proceso inkluzijako e Rromengo ando foro Subotica džal majvuče dromeja, odolaćii kaj, sar vaćarda, ando amaro foro inćarda šajipe te dićhel sas udžilimašći raštraći politika sikavelpes po lokalo.
- Čačimasa šaj te mothav kaj o Foro Subotica šaj te avel sikadipe lačhe praksako kana si o alav pala majbuhljaripe thanengo e Rromengo thaj pala but aver guverne ando buhljaripe Srbijako. Ando kava foro, savo barvarel butekulturalizmo thaj tolerancija, dikhlem kaj si e Rroma jekhetane forutne kale forostar thaj sa naisarimata pala šerutnipe Forosko Suboticako palo bućaripe te majbuhljarelpes o than rromane amalimasko. But si manđe po kamlipe kaj but sigo majzurjavasa amaro lačhimasko khetanimasko bućaripe, savi inćardam sar vi džiakana e Forostar. Ramosarasa vi jekh protokolo palo kkhetanimasko bućaripe, a po kamlipe si manđe vi godova kaj si andar Subotica duj amare membrurja Nacionalne konsilestar thaj godova si inke jekh rezono sostar si kasavo lačho khetanimasko bućaripe, majanglal maškar Nacionalno konsilo thaj Foro Subotica, thaj sostar si o proceso inkluzijako e Rromengo gajda aresimasko – vaćarda o Nakić.
E pokrajinaći dikhljardi, Jelena Jovanović, inkalda kaj e Subotica si jekkhutno foro ande Subotica savo inćarel duj rromane koordinatorja, so sikavel kasavo semnipe lokalosko korkorrorotuipe dija sar majlačharelaspe o than rromane nacionalne amalimasko. Voj lundžarda kaj si e rezultaturja dićhimašće, no kaj si inke nekozom kotora save trubun te majlačharenpes.
- Kova so sas jekh katar amare inkalde mothodimata, so sas varekana, a trubulipe si pe bućarelpes pale godova, a akana naj, si te e rromani čhib anelpes sar losarimasko šeho palem ande fundošće sikavne thana thaj me paćav kaj e rromane koordinatorja thaj rromano amalipe pala godova bućarela thaj paćas ando avutnipe amare raštrako thaj avutnipe amare čhavorrengo kaj šaj savorra khetane te džas majdur – mothoda o Jovanović.
Pala Subotica e forutne rromane nacionostar si kotor katar etnikani i kulturaći pilta, vaćarda o forosko angluno Stevan Bakić, pala soste o Foro del baro lesamalipe sa e bućarimašće save si vortosarde palo majlačhipe thanengo e Rromengo.
- Foro Subotica but ćerda ando kava brš. Konkretno, prdal o projekto „Romaktet“ lačhardam e thana ando Lokalosko amalipe Čantavir, Halas thaj Haladaš, thaj vazdam majbaro nivelo kvaliteto trajosko thaj buhljardam lesamalipe katar trajosko trujalipe. Kate si opralvelarako projekto savo si but semno pala Rroma, a godova si antidiskrimincija thaj interkulturalizam, kaj vazdam e gođaveripe sikamnengo pala tolerancija thaj haćaripe. Sasmen ando kava brš vi Maškarthemutno đes e Rromengo ando aprilo, kana ašarimasa furjolas o stjago Rromengo po Forosko ćher thaj pe godova varo sikadam paćivalipe pala rromani populacija.Lundžarasa vi majdur te godova khetanimasko bućaripe majzurjavas, kaj musaj te khosas thaj te haravas sa predrasude thaj atolerancija, musaj te avel haćaripe thaj khetanimasko pharo bućaripe palo majbuhljaripe rromane amalimasko ando amaro foro – mothoda o Bakić.
Po agor katar bešimasko maladipe, inkaldino si kaj e Subotica sikavel lačhi praksa kana si ando pučhipe majbuhljaripe thanengo rromane nacionalne amalimasko.
Mištardo si majzuralo khetanimasko bućaripe, savo vi lela ašunimašći forma gajda kaj ramosarelape protokolo palo khetanimasko bućaripe ande 2022. brš.
Romski Jezik 
Српски језик