BUĆARIMASKO MALADIPE E MINISTREJA RUŽIĆEJA – RUŽIĆ ALAVARDA BUHLJARIPE KUJBENGO PEDAGOGIKANE ASISTENTURJENGO

Angluno džipašerutno Thagarimasko Srbijako thaj ministro palo sićope, gođaveripe thaj tehnologikano buhljaripe Branko Ružić alavarda kaj o Ministerijumo lundžarel te buhljarel o kujbo pedagogikane asistenturjengo palo zurjavipe sikamnenđe rromane nacionostar thaj kaj pala sikavimasko 2022/2023. brš si angažuime inke 10 neve.

Ando svato e manušenca andar Nacionalno konsilo rromane nacionalne minoritetosko o Ružić liparda kaj o angažuipe pedagogikane asistenturjengo ande maškarutne sikavne thana avena prioriteto ande avutnimaski vrjama.

Vo dija gođi pe godova kaj o Ministerijumo ando kamipe zurjavimasko kompetencijako 250 pedagogikane asistenturjengo, financijenca učharda thaj nakhada onlajn sikavipe “Sikavipe pala pedagogikane asistento pale čhavorra thaj sikamne rromane nacionostar savenđe trubul lundžardo zurjavipe ando sićope.”

Thagaripe Srbijako sikada kaj lel sama pale sa nacionalne minoriteturja, sar vi pale Rroma. Po kamlipe si manđe kaj si sa majbaro kotor učhardimasko rromane čhavorrengo ando anglalsikavimasko sićope (hurdalina), fundošće sikavne thanenca, sar vi vuče sikavimasa”, mothoda o ministro.

Po maladipe sas svato vi pale efekturja katar aver afirmativne mere zurjavimaske palo majbuhljaripe sikavimasko sikamnengo thaj studentonengo rromane nacionostar so anda džiko baripe đindosko čhavorrengo pala 20 % save džan po gatisarimasko anglalsikavimasko program thaj ramosarenpes ando fundosko sikavno than.

Ministro Ružić dija gođi kaj afirmativna mera palo ramosaripe pe vuče sikavne thana crdel bučumo andar 2003/2004. brš, sar vi godova kaj kale merava sas ramosarde 1743 studenturja.

Ando sikavimasko 2021/2022. brš čačardine si 1114 stipendije pale sikamne ande maškarutne sikavne thana ande Republika Srbija, save si membrurja rromane nacionalne minoritetorestar”, mothoda o ministro thaj lundžarda kaj si jekh katar mera vi uladipe bipoćinde lilengo pale sikamne andar socijalno/materijalno čorre familije.

Ministro sikada naisaripe Nacionalne konsilešće rromane nacionalne minoritetorešće po lačhimasko khetanimasko bućaripe ande sa kala aktiviteturja.

Trajisaripe lačhe khetanimaske bućarimasko čačarda vi o prezidento Nacionalne konsilestar rromane nacionalne minoritetorestar Dalibor Nakić

Po maladipe sas e raštraći sekretarka Anamarija Viček, sar vi e manuša andar Nacinalno konsilo Božidar Jovanović, Zdravka Simić thaj Dejan Vlajković.

Izvor: https://mpn.gov.rs/vesti/ruzic-najavio-sirenje-mreze-pedagoskih-asistenata/

RNS

See author's posts