ŠERUTNO MISIJAKO OEBS ANDE VIZITA NACIONALNE KONSILEŠĆE
Šerutno misijako OEBS-osko, L.E. Jan Bratu, sas ande vizita Nacionalne konsilešće rromane nacionalne minoritetonendar thaj ćerda bućarimasko maladipe bešimasko e šerutneja Nacionalne konsilestar, Daliboreja Nakić thaj leske pašune bućarnenca.
Ande lačhi atmosfera thaj svato, dijapes svato vi pe tema katar inkluzija e Rromenđi, sar vi pe averčhande teme andar amalimasko politikano trajo ande Srbija thaj regiono.
O prezidento Nakić pindžarda e delegacija OEBS e bućasa savo nakhavel Nacionalno konsilo thaj svatosa inkalda varesave dine mere save khetanimaske bućarimava maškar OEBS thaj Nacionalno konsilo majbut lačharena e inkluzija e Rromenđi.
Šerutno Misijako sikada bahtardipe kas Konsilesa šerutnisaren terne thaj džangle manuša thaj kaj o Nacionalno konsilo lela šerutnisaripe Koordinacijava Nacionalne konsilendar ande Republika Srbija po agor čhonesko marcinosko 2022. bršesko.
Paša semne teme save si phangle pala inkluzija e Rromenđi thaj šerutnisaripe Koordinacijava, dijapes svato palo avutnimasko ramosaripe forutnengo thaj diskriminacija. O prezidento Nakić mothoda šerutneske Misijaće kaj o Konsilo aktivno lela kotor ande promocija thaj sikadipe ramosarimasko, sar vi godova kaj, averčhandimasa katar nakhlo ramosaripe, akana kotor lela vi majbaro đindo e Rromengo sar šerutne ramosarimatarja ando buhljaripe Srbijako.
„Baro naisaripe palo ciknjaripe diskriminacijako das udžilmasa majanglal prezidentošće Republlikatar, Aleksandrošće Vučić, savo ande pire mothodimata butimasa inkalel thaj liparel e Rromen sar pharlimasko thaj jekhetano them ande Srbija. Majdur, sikavav griža thaj lesamalipe pala Rroma andar Ukrajina save ando piro tradimasko pharipe haćaren diskriminacija katar varesave raštre EU kana roden lendar ažutisaripe palo nakhavipe velarengo“, inkalda o Nakić thaj rudisarimava roda katar šerutno Misijako te godova pharipe inkalel anglal pire kolege, manuša anglal Misija ande aver raštre. Po agor, mištardo si khetanimasko thaj intenzivno bućaripe ande avutnimašći vrjama, detot kana si ando pučhipe promocija ramosarimašći thaj nakhadipe Strategijako pala socijalna inkluzija e Rromenđi thaj Rromnjenđi.
Ande delegacija Misijaći, paša L.E. o raj Jan Bratu, sas vi e Zuzana Pavlikova thaj Štefan Nuner.
E Delegacija Konsilešći, pašo prezidento Nakić, ćerdine vi o prezidento Gatisarimašće odborestar Pava
Delegacija Konsilešći, pašo prezidento Nakić, ćerdine vi o prezidento Gatisarimašće odborestar Pava Ćabrilovski thaj generalno sekretari Dejan Vlajković.
Romski Jezik 
Српски језик