Bućarimasko bešimasko bućaripe ando kabineto džipašerutnesko thagarimasko
Pe inicijativa katar dikhljardi ando parlamento Srbijako Sandra Joković thaj Nacionalno konsilo rromane nacionalne minoritetostar, inćardo si o bućarimasko bešimasko maladipe e džipašerutneja Thagarimastar thaj ministareja palo sićope, gođaveripe thaj tehnologikano buhljaripe, Branko Ružić.
Anglal delegacija sas o prezidento Nacionalne konsilestar Dalibor Nakić, a ande late sas šerutni po Gatisarimasko odbori e raji Pava Čabrilovski, šerutni pe Pokrajinaći kancelarija pale inkluzija e Rromenđi e raji Ljiljana Mihajlović thaj dikhljardi Sandra Joković.
Nacionalno konsilo inkalda nekozom semne mere savo o Ministerijumo trubul te čhol anglal Thagaripe Srbijako, a save inćaren palo kamipe majvazdipe thaj buhljaripe sikavimašće procesosko ande inkluzija e Rromenđi.
Džipašerutno Thagarimasko, Branko Ružić sikada baro intereso pala khetanimaske aktiviteturja Ministerijumostar thaj Nacionalne konsilestar save majlačharela o statuso katar Pedagoške asistenturja, majbarvarela đindo stipendijengo pala sikavimatarja ande maškarutne sikavne thana thaj sar maj semno, majbarvarela o đindo pedagoške asistenturjengo thaj majbarvarela e kvota palo ramosaripe studentonengo rromane populacijako.
Ando alav Ministaresko, paša o raj Ružić, po maladipe sas vi o ažutimatari ministaresko prof. dr Bojan Tubić thaj šerutno Kupako palo sićope minoritengo, socijalna inkluzija thaj lesamalipe bilačhimatar thaj diksriminacijatar dr Snežana Vuković.
Ando alav delegacijako, prezidento Nakić naisarda e raješće Ružić palo avipe, interesuipe thaj zurjavipe savo del ando nakhadipe katar sajekh inkluzija e Rromenđi.
Prilog ministarstva ⤵️