Ćije katar socijalne bešimaske thana pala 12 rromane familije ando foro Prokuplje
Džipašerutni Thagarimastar Srbijatar thaj ministro vazdimasko, dromardimasko thaj infrastrukturako, prof. dr Zorana Mihajlović, sas ađes ande vizita ko foro Prokuplje e Semosa Fabricijesa, šertune manušeja pe Delegacija Evropaće unijatar ande Srbija thaj Dalibireja Nakić, prezidentova po Nacionalno konislo rromane nacionalne minoritetonendar. Von sar ćherutne, forosko angluno Milan Aranđelović thaj šerutno po Topličko trujalipe Zlatan Miljković, dine e ćije katar socijalne bešimašće thana pala 12 rromane familije ando than Mala Guba ando Prokuplje.
Džipašerutni Thagarimašći kamlisarda e baht sa e familijenđe thaj inkalda kaj ande nakhle duj brša khetane e Eu ćerdinepe bešimašće thana pala majbut katar 200 familije, jal milje Rroma thaj Rromnja gatisardine pire bešimasko pučhipe.
„Semno vi vi kova so ćerasa majdur. Naisarav forošće angluneske savo irisardape talo akharipe te e ćhera lačharas khetane. Lundžaras vi e neve projektova andar nevi IPA, molimava katar 60 milionurja evra, katar save 20 milionurja evra si ulade pala socijalne bešimata, niči pale Rroma, no vi pale manušnja save inćardine bilačhipe, persone save inćaren invaliditeto, terne“, inkalda e džipašerutni Thagarimašći.
Prezidento Nacionalne konsilestar rromane nacionalne minoritetonendar, Dalibor Nakić, naisarda ćherutnenđe, Thagarimašće Srbijaće thaj Delegacijaće EU ande Srbija po lundžaripe bućarimasko te sa e Rroman ande Srbija trajisaren sar trubul thaj mothoda:
„Baro đes pala rromano amalipe ando Prokuplje. Kala ćhera si sikadipe katar zuralo bućaripe Srbijako, po čikat katar prezidento Republikako, ando proceso integracijako e Rromengo thaj majbuhljaripe lenđe thanengo thaj socijalne politikengo savi inćarel thaj nakhavel o thagaripe Srbijako. Amen sam forutne Srbijaće, sar vi Evropaće, thaj paćav kaj o zurjavipe EU pale Rroma lundžarelape vi ando avutnipe kana si e inkluzija amare amalimasko ando pučhipe“, mothoda o prezidento Nakić.
Romski Jezik 
Српски језик