LОŠANIPE PALO MAŠKARTHEMUTNO ĐES E RROMENGO ANDO FORO BOR

Maškarthemutno đes e Rromengo ando foro Bor inćardapes dujđeseske lošanimasa thaj bute manifestacijenca. Organizatori sas koordinatori pala rromane pučhimata Forostar Bor, savo si vi prezidento Odborestar palo sićope NKRNM Vladimir Šainović, e kobućarnenca Saša Kamenović, Mangal Ljatif, sar vi Ćidimata “Romska inicijativa mladih “Gypsy soul”, Ćidipe Rromengo e invaliditetova “Amal”, Ćidipe forutnengo “Herderovo”, thaj Ćidipe forutnengo “Rromengo, Egipćanengo, Aškalijengo Bor” REAB.

1. Po angluno aprilo ando forosko ortuipe Forostar Bor ćedini si angrustijali sinija pe savi po institucionalno nivelo dijape svato pale pharimata, sar vi aresarde rezultatonenca e Rromendar ande nakhle brša. Čačardo si kaj si pozitivne pasurja anglal, no kaj vi mjadur trubul te aktivno bućarelpes po agorisaripe pharimatengo savenca rromano nacionalno minoriteto malavelpes dešbršenca majpalal.
   Po godova đes, ando Themešće lilarvarni inćardapes “Rjat rromane čhibjako” pe savi sikadape kulturaće aresimata rromane lilvarnendar forostar Bor Jašarestar Murinatar, Marina Salić thaj Kadrija Šajinović, thaj maškar prezentacija sas sikadini rromani kultura, tradicija thaj dumutnipe rromane nacionostar. Dićhimasa pe godova kaj ando foro Bor si but Rroma save si horahane paćivalimasa Nazim Demiri dija svato palo horahano sumanlo đes, čhon katar Ramazanosko trušipe.
   Po Maškarthemutno đes e Rromengo, ćerdapes sikadipe khetanimaske bubćarimasa e Maškaresa pale kultura, sikavimašće institucijenca, sar vi pedagogikane asistenturjenca andar foro Bor.

RNS

See author's posts