Prezidento Nacionalne konsilestar rromane nacionalne minoritetonendar, Dalibor Nakić, bahtarda ando alav membrurjengo Nacionalne konsilestar thaj piro personalno alav, sa čačepaćivale Rromenđe ađesutno sumnalo đes – e Bibijaka (e Bibija).

Prezidento Nacionalne konsilestar rromane nacionalne minoritetonendar, Dalibor Nakić sas ađes ando Parlamento Republikako Srbijako po sikadipe Nacionalne platformako pale integracija e Rromenđi ande Srbija. Pašo prezidento Nakić, ando alav katar Nacionalno konsilo, saas vi o prezidento Gatisarimašće odborestar, Pava Čabrilovski, pokrajinaći dikhljardi thaj membro Konsilesko, Jelena Jovanović, thaj guvernako membro ande Smederevska Palanka thaj membro Konsilesko, Zdravka Simić.

Šerutno misijako OEBS-osko, L.E. Jan Bratu, sas ande vizita Nacionalne konsilešće rromane nacionalne minoritetonendar thaj ćerda bućarimasko maladipe bešimasko e šerutneja Nacionalne konsilestar, Daliboreja Nakić thaj leske pašune bućarnenca.